喜來稀肉 (Closed)

無得去韓國，唯有去食韓燒解下旅行癮。之前已經聽朋友大力推薦過依間喜來稀肉物超所值，今日一試果然無介紹錯。餐廳係地庫，空間都幾大。每張檯相隔都有一定距離。坐得舒服又確保到私人空間。Menu選擇都幾多，淨係牛都有超過十款以上。我地揀左真雪花牛肉同護心牛肉，另外仲叫多左個水冷麵。一碟牛望落好似唔多，但食落份量真係足夠有餘。雪花牛肉肥瘦均勻，燒好放入口一試，真係無得彈！肉質勁嫩，入口即化。唔加配菜落少少醬就咁食都已經好好味。護心牛肉牛味濃郁，比雪花牛更有口感。兩款肉都好好味。依度嘅配菜可以無限添加，生菜新鮮，泡菜酸度適中，超級惹味。係燒好嘅牛上再加上泡菜、生菜之類嘅配菜，令到口感更加豐富。係咁keep住食都唔會覺得厭。怕淨係食燒肉太熱氣，所以叫左碗水冷麵中和下，雖然個麵底捲埋左一齊，食落一餅野咁，不過勝在湯頭清甜，真係做到解膩嘅效果。依間韓燒無論環境定食物質素都有中上嘅水平，想再食韓燒嘅時候一定會再黎幫襯。