八户屋和食料理

Open Now

Now Closed

去八戶屋食八戶全盛拉麵下午茶餐，連凍飲收 38 元，貴過同場樓上的上巿公司快餐店，但佢依然生存到。睇相片唔知碗麵有幾大，驚會係迷你版，不過見唔少食客都食緊佢，望落係正常份量，先夠膽落單。餐飲有兩款凍飲可選擇，唔使加錢都有凍飲，好吸引，之但係見有即磨熱咖啡，咁都係飲咖啡啦。再細心睇餐牌，茶餐選擇算豐富，飯、麵、包呢啲大路野唔少得，最意外係有夾餅！Waffle喎，女生至愛，包括上咗年紀的婆婆，今日就見到一位婆婆慢食雞翼沙律配夾餅，食得非常享受添。男士就鍾情咖喱豬扒飯同拉麵多啲，壽司配烏冬餐銷情亦唔錯。點解多人食拉麵，除咗平，食落就知佢有內涵。呢個價錢可以食到兩款豬肉，兩者都係入口即溶兼有肉味；蟹柳冇雪味，冇煮到爛蓉蓉；配料紫菜同芽菜唔係得幾條；拉麵份量多，略硬身，好有驚喜。湯底嘛，正正常常，唔會令你要不停灌水。成碗麵具質素，加埋杯香濃咖啡，食得暢快之餘，擔心佢好快會加價。