瀧赤料理 (Closed)

今日喺巴倫紐睇鐵甲人，睇完動作片鬼咁肚餓，見到斜對面呢間日本料理好有日本小店嘅風格，就走咗入嚟試下。餐牌上有好幾款清酒，全部我都好想試，可惜今日揸咗車，都係留番下次先。自家製玉子燒，玉子燒非常厚身，蛋味香濃而帶有點點嘅清甜味，口感札實，明顯係用得多蛋嘅緣故，特別鍾意佢嘅面頭被火微微燒過，令整體感覺更加香口。劍魚壽司，劍魚含有比肉類高約10倍嘅不飽和脂肪酸，係健腦嘅重要物質，肉白略帶淡紅色，含有豐富嘅脂肪，肉質柔軟，口感十分肥美，細嚼新鮮嫩滑。火炙鹽燒帶子壽司，帶子被火炙過後顯得極為誘人，肥大肉厚，入口清甜無比，比起出面食到既份外鮮甜，帶子上面嘅一小撮鹽更加起到點晴嘅作用，用鹹味帶番出個鮮甜味，正。鰻魚丼，鰻魚丼塊鰻魚都幾大塊，基本上遮哂成個飯面，鰻魚嘅底下有細碎嘅炒滑蛋，香濃嘅鰻魚汁本身已經十分之美味，連埋片醃漬蘿蔔一齊食，就更上一層樓。呢間小店嘅性價比都唔錯，值得番兜。