TC Bistro (Closed)

今日去咗搵個朋友去新蒲崗食晚飯，同聚下舊。佢話帶我去食好嘢，訂咗一件牛柳今晚一齊鋸扒。我哋7:30鐘去到，雖然係平日，好彩訂咗枱，如果唔係都無位。環境吾錯，地方唔係好大，但係都唔會坐得好迫。見到牆身同碟嘅裝飾都有牛嘅唔同部位，就知道依度食牛會唔錯。開始點餐，除咗訂咗嘅威靈頓牛柳，仲叫咗牛油果帶子沙律，龍蝦湯，帶子天使麵。沙律好新鮮，龍蝦湯味道濃厚，好creamy，帶子天使麵都唔錯，件麵包就一般，個威靈頓牛柳真係冇得彈，酥皮包住件牛柳，保持住件牛柳溫暖，唔會越食越凍，肉質好Juicy，好嫩滑，我哋訂咗個一人份量，下次可以訂多啲。最後點左個焦糖燉蛋，同埋飲咗一杯熱咖啡。好滿足嘅一餐。順帶一提，服務員態度都好好。