盈記四季養生麵館

Open Now

Now Closed

今次係我第二次嚟食盈記四季養生麵館，感覺比上一次進步良多！首先，服務態度良好，即使係繁忙時段，侍應們都會盡佢地所能去滿足每一位食客嘅要求，又會盡心講解唔同麵款嘅分別，十分有耐性。食物方面，我嗌咗一份一人套餐，包一碗米線(可轉通粉或者米粉)、一份小食同一杯餐飲(凍飲加$3)，盛惠$78。我揀咗A09：藥膳農場雞竹笙銀耳養生湯米線，貪佢有齊藥膳、雞、竹笙同銀耳呢4款我喜愛嘅食材。碗米線一嚟到，個份量大到嚇咗我一跳，銀耳直頭多到唔使錢咁湯底有淡淡嘅藥膳味、雞件好入味，竹笙同銀耳都好爽口！小食方面，我嗌咗一碟藥膳雞腳，雞腳整得非常之淋，好易入口，而且小食份量一啲都唔少，雞腳數量都有成6隻，相當大方。整體嚟講，一人套餐味道絕對高質。唯一美中不足之處係環境太過狹窄，午飯時間搭埋枱就更加侷促，食完只會想拿拿聲走，想同朋友慢慢撐枱腳嘅話就要諗清楚了。