燒味滷師 (富榮花園) (Closed)

是日冬至，去親戚屋企食飯又點可以兩手空空呢？所以都斬左d 料上去。今次試嘅係位於大角咀富榮花園嘅「燒味滷師」。至尊燒鵝：燒鵝以獨門秘方炭燒而成，外皮夠香脆，肥瘦均勻，裏面嘅肉柔軟得黎亦夠香，食落好多汁，入口鬆化，再配埋甜酸汁，非常好味。上庄都只係110蚊，都算係性價比高。燒味佬叉燒(半斤)：叉燒色澤好靚好吸引，半肥瘦，肉質鬆軟多汁，邊位微燶，食落焦脆可口，配埋餐廳秘製蜜汁，食落非常惹味。客家鹽焗雞(半隻)：鹽焗雞鹹香味啱啱好，唔會太鹹，雞肉肥瘦適中，入口嫩滑，咬落去有好多肉汁流出黎，點埋沙薑汁食，真係非常好味。半隻雞只需要$35 ，這個味道、這個價錢，絕對是良心價。泰式鳳爪：鳳爪無雪味，去左骨，非常適合老人家同埋小朋友食，一盒份量好多，仲配埋青瓜、辣椒同醋，入口酸酸地，唔辣，食落相當爽脆，非常開胃，令人一隻一隻咁食過不停。