桃園制作粥麵餐廳 (廣田商場) (Closed)

開張日試完果個失敗嘅早餐之後，我聽咗我妹話呢度D小炒好OK，於是乎我又嚟試多次，今次揀咗午市時段。新舖開張期內，座無虛席，近乎必然。但係假如D嘢食唔OK，就會係剎那光輝不代表永恆。呢個飯還算食得吓，奈何店舖所在係屋村區，收人近四十蚊個飯，D雞翼點能夠整到乾憎憎呢？屋村街坊錢唔易賺而且有要求呢！麵質未見出色，灑咗一堆疑似蝦子物體，但係我食唔到有蝦子味。最抵打係豬手，以價錢嚟講我覺得份量對得住街坊，但係好遺憾豬腳趾之間嘅毛未清理得乾淨，雖然夠稔，但係南乳味唔出，如果可以畀番多少心機清乾淨D毛呢，我都會考慮再幫襯嘅。試過呢度D即磨咖啡苦夾澀之後，都係叫凍奶茶穩陣，而亦確實，呢杯凍奶茶合格。寫食評總係有單有據先嚟得有根有據。縱然我自己短期內肯定唔會再幫襯，但係上傳餐牌方便人哋，有頭有尾，我覺得係應該。