夏午茶 (Closed)

接阿仔放學，被鮮藍色嘅招牌吸引！呢間飲品小店有一個得意嘅名字叫「夏午茶」。老闆係一位可愛親切嘅少女，佢誠意推薦燕麥奶昔。我知道燕麥好處多多，既有水溶性纖維，可助降低膽固醇，亦非常高纖，有助提升飽肚感。無諗過燕麥可以加入飲品，咁健康嘅配搭，我當然要試吓。🥭鮮芒果燕麥奶昔（$37）混合咗新鮮芒果蓉、濃厚嘅酸奶同粒粒燕麥，味道微酸帶甜，而且富有燕麥嘅香味。我覺得飲完一杯已經好飽。如果炎熱嘅天氣冇乜胃，可以飲返一杯，絕對係健康又消暑嘅選擇。🍓酸奶莓莓綿綿冰 （$32）1/3杯新鮮士多啤梨配上酸奶同冰沙，口感冰涼順滑，清爽唔會過甜。天然嘅果香同奶香，令小朋友飲得好開心。呢杯飲品仲可以配合三款不同嘅茶底（紅茶、鐵觀音、四季春），令味道更有特色。臨走嘅時候，突然落起毛毛細雨。美少女老闆細心地幫我用膠袋裝起兩杯飲品，方便我攜帶。我覺得「夏午茶」唔單止適合夏天嘅下午時份去飲，就算春天、秋天同冬天嘅任何時候都可以去嘆返杯美味可口嘅飲品。