Sprout Organic and Natural Cafe (Closed)

我本身一早約左朋友係中環食午飯，點知臨時甩底。急忙再另揾朋友食晏，於是改左黎呢間餐廳，因為我買左呢間團購，應該最少一天前要訂位，老闆好好，我冇訂位都照比我同朋友享用午餐。我地揀左1份餐湯、1份田園沙律; 有機野米飯配沙樂美腸、櫻桃茄、火箭菜伴蕃茄汁同有機野米飯配野菌雞肉伴紅酒忌廉汁，仲有2樽有機紅菜頭汁。先講是日餐湯，酸酸地o既疑似忌廉湯，怪怪地，或者我飲唔慣D有機湯卦?!至於田園沙律，其實真係唔錯，可惜係用湯碗載住，整到好似一堆咁，似好似係牛咁食草，我諗用碟上會好D。沙律唔係落沙律醬，而係落醋，酸酸地，都OK!有機野米飯配野菌雞肉伴紅酒忌廉汁都唔錯，又大碟，有機野米飯有D似意大利飯，QQ地，配上忌廉汁好易入口。雞肉切成一小口，唔會太大件，一口一件，大小恰到好處，亦唔多覺有雪藏味。我唔記得問朋友佢果份有機野米飯配沙樂美腸、櫻桃茄、火箭菜伴蕃茄汁味道如何?!最後，就係有機紅菜頭汁，原來紅菜頭係護肝食物首選，且有豐富鐵質，加上纖維極高，能幫助消化，促進腸胃蠕動。雖然紅菜頭汁咁有營養，我飲唔慣，淡左少少。值得推介再食，夠晒有營養、健康。