杏甜品 (豉油街) (Closed)

黎到旺角食完Dinner，當然唔會放過食甜品的機會，今次就揀左杏甜品。呢度顧名思義出名係杏汁甜品，但其實都仲有好多款式，而我幾鐘意佢無添加同埋低糖，加埋用健康食材，相對上可以減低我的罪惡感又滿足到食糖水的慾望。今次就試左呢度出名的杏汁桃膠芋圓木蓮凍，呢度的杏汁用龍皇杏，杏仁味較重，而木蓮凍坊間比較少用，平時通常用開仙草凍。木蓮凍能夠清熱降火，入口即化。而桃膠煮得比較淋，加上採用細粒的芋圓，兩者都較容易入口。整體味道唔算太甜，加上配料唔算太重味道，杏仁的味道相對比較濃，感覺比其他糖水健康。另外因為我本身係榴槤Fans，所以忍唔住手叫左榴槤湯圓。糖水係桂花糖水，唔太甜但帶出淡淡桂花味，而驚喜的係湯圓，榴槤餡超鮮甜，肯定唔係人工後加的甜味，證明揀選的榴槤肉質素好好，先做出呢種自然而濃郁的甜度，如果係榴連Fans唔可以錯過！