Café & Meal Muji

Open Now

Now Closed

MUJI cafe係我行街嘅食堂之一。只要去到一個商業區有分店嘅我就會考慮食佢。呢間喺奧海城二期嘅muji cafe係眾多連鎖店舖入面體驗較好嘅，座位相對闊落，佈置格局都令人舒適，食物質素都唔錯。我一般都會點三品或者四品套餐。今次點咗四品，有兩凍食兩熱食加埋穀飯同味噌湯。套餐入面最濃味嘅當數味增湯，其餘嘅相當清淡，啱晒我同屋企人嘅口味。我鍾意呢度食物配搭多樣、營養均衡、烹調手法健康、食材較為天然（但係對於重口味嘅人嚟講可能會覺得淡無無未必食得慣）。我一般最尾都例牌加返個抹茶芝士蛋糕做甜品，HK$35跟餐好抵食。蛋糕嘅用料係堅嘢，食得出抹茶特殊嘅香味。濃度甜度、餅底加埋紅豆嘅應襯都係啱啱好，食完齒頰留香。喺香港以咁嘅價錢食到呢種質素嘅抹茶芝士蛋糕，真係一大幸事。今次美中不足嘅係睇到有個員工冇帶口罩，仲一路配餐一路口水花噴噴同隔離左右嘅同事傾偈。唔講衛生，影響專業同感觀，需要改進。