好茶養生 (MOKO新世紀廣場) (Closed)

好茶養生係一間主打養生同健康嘅茶飲店，唔似大路嘅台式手搖茶飲店，佢地主要賣唔同嘅花茶同水果茶，另外亦有賣多款茶味雪糕同蛋糕。同同事喺Moko食完lunch，想外賣杯野飲返office飲，飲得珍奶多又怕肥，見好茶養生好似比較健康啲，就黎試下。士多啤梨茶($36) - 哩度嘅茶都比較大杯，凍飲都有700ml。同事揀嘅士多啤梨茶揀左少冰半糖，見倒真係得幾舊冰，飲落亦只係涼涼地唔會有凍嘅感覺，就算而家天氣凍飲完都唔會好寒咁。半糖飲落冇乜甜味，以士多啤梨原味為主，茶味亦唔會太澀，感覺幾健康。水果茶($38) - 我揀嘅水果茶要少冰少甜，比起頭先嘅半糖會多返少少甜味，但又唔會太甜，水果茶入面有菠蘿、火龍果、檸檬同青檸，酸酸甜甜味道都唔錯。玫瑰荔枝慕絲($48) - 同款味道嘅蛋糕有得揀心形或者玫瑰花形，兩款都明顯好得女士歡心。慕絲蛋糕好軟綿，唔會太甜食得淡淡荔樣同玫瑰味，唔會好假好藥水。野莓忌廉朱古力泡芙($42) - 泡芙好鬆軟，朱古力味亦好濃。總結，茶飲價錢正路，sell健康就算平時想過下口癮飲多杯都唔怕，都有一定吸引力，反而蛋糕就比同價位嘅蛋糕店細件少少，冇野飲咁吸引。