大麥牛肉麵 (Closed)

收工去完做gym決定食啲健康野，斜路頂有呢間大麥牛肉麵。睇左門口介紹話啲麵係自家製，而且無落味精，好健康，啱曬我。呢度座位唔多，裝修簡單清新。一入到去老闆娘就熱情招待同埋介紹呢度既食物。餐牌第一個係招牌紅燒牛肉蕎麥麵（$58）。台灣店比較少見蕎麥麵，所以決定試試。可以揀辣或者唔辣，我同朋友都揀左唔辣。自家製蕎麥麵，比平時我食開既蕎麥麵粗，成分健康啲，每一啖都好有麥既口感，少啲添加劑，少一份彈性，同食普通麵既口感有啲分別。飲品有包裝可樂雪碧檸檬茶，或者呢度特飲桂花酸梅湯。咁特別我地決定要個酸梅湯（$10）啦。酸梅湯係誠意之作，真係有酸梅係入面，無我想像中咁甜，加上桂花香，非常清爽。另外要左個滷水拼盤（$38）。滷蛋一隻，雞翼同雞搥各兩隻。呢個就差少少，好似有少少乾，同埋滷蛋未夠入味。涼拌青瓜（$26）。青瓜爽甜，加上少少辣椒係上面，幾開胃。份量好大，應該有成條青瓜！呢度食物同氛圍都好有家的感覺。食材都行健康路線，價錢都唔貴，唔錯。