放下素 (Closed)

好友生日，決定食餐素慶祝一下~餐廳將每一套餐具都放係枱度，都幾方便既！本身自己都幾中意食PIZZA，所以一定要試佢個素食PIZZA喇！芝士蕃茄味，皮薄又脆，個人覺得唔錯！再試埋放係PIZZA附近既墨西哥卷，入面加左辣椒醬，唔太食得辣既朋友應該會覺得好辣，雖然食完即刻想飲番啖水，但令我有想食多舊既衝動。墨西哥卷隔離仲有個素漢堡扒，口感都有D似肉，食落去都幾IN UN又唔會有滯既感覺。另一樣我比較欣賞既炸物係芝麻芋圓呀，一啖咬落去就有啖啖芋泥同埋青蘋果蓉，D味都好夾，同埋足料既！除左食煎炸野，我地都食左唔少涼拌菜，大熱天時食就最岩喇！好中意佢個萵荀，爽口開胃。另外仲有芋絲炒菇，再加左D三色椒，都係配搭得唔錯，味道又唔會太濃。廚師仲整左豉油皇腸粉，因為加左D豉油，食落D味就冇咁寡喇！甜品方面，最中意佢個涼粉，加少少淡奶已經好好味，同埋整到細細粒賣相都唔錯！芋頭西米露都同甜品鋪個D有得揮呀！因為今次係慶祝朋友生日，咁岩餐廳有壽包，加枝蠟燭仔即刻可以許番個願同吹蠟燭呀，蛋糕都唔駛買！