傷心酸辣粉 (科學館道) (Closed)

今日天氣突然涼返，突然好想食酸辣粉，所以就決定傷心一下，我哋六點前到仲有下午茶餐，叫左一個口水雞配酸辣粉（$45）再加杯凍檸茶（$5），望吓餐牌見到有個水煮肥牛好吸引（$139），決定叫埋豐富D提早食埋晚餐，仲有好多小食想食不過驚食唔晒最後只加左酸辣土豆絲（$25），全部都要中辣 🌶🌶酸辣粉保持水準，薯粉煙韌適中，酸辣湯底同Q彈嘅薯粉就係絕配，口水雞雞肉嫰滑，土豆絲惹味爽口，食辣嘢最驚唔夠辣，呢間全部都夠辣度🔥 終於等到水煮肥牛出場啦，嘩！估唔到咁大鍋，賣相非常吸引，一放上枱啲香味已經撲晒埋嚟，肥牛份量都算多入面仲有寬粉青瓜芽菜，香味夠層次同最緊要keep到食到尾都夠熱，我哋全部清晒，望住友人流晒汗同流晒鼻水個樣真係好傷心忍唔住笑咗😆💡呢餐每人$107，絕對係平食川菜嘅好選擇！見到有得買傷心辣椒油，望啲渣已經覺得正，大大樽標榜冇添加劑都係$29 ，買咗一樽返屋企，一打開好香呀，聽晚用嚟整涼拌小食先。