銀杏冰室

Open Now

Now Closed

一向好喜歡銀杏館嘅理念，既然新開，就去支持下。侍應們係公公婆婆，好熱情，會問你好唔好食呀？下次再嚟吖！好敬業樂業。不過有個後生d嘅經理(?)就幾燥底 。香酥雞鎚 $5有驚喜！好食過連鎖式快餐店喎！炸得好靚，味道亦不錯。醬燜香菇 $5傳統用蠔油燉煮，冬菇夠淋身，入味嘅。豉油皇炒麵 $10係比巿面上嘅少咗韭菜同芽菜。但炒得算乾身唔油。芝麻飽 $2個面鋪滿芝麻，好香。至少個飽唔似隔夜。魚蓉燒賣 $4算好食，有少少蒜香味。蝦米腸粉 $8蒸嘅，枱面有醬可自行調味。蕃薯粥 $5好大碗，雖然佢唔係將d蕃薯煮溶晒果種，但蕃薯好咬口，好甜。整體食物係少油少鹽少糖，無味精，清清淡淡幾健康。坦白講，當然唔可以話好好食，但一定唔會係難食，呢個價錢咁質素係超晒班。何況，食銀杏館係食份情懷。餐廳都有蝴蝶酥、曲奇賣，如果想留返d位比有需要的人享用，可以幫襯下買呢d，等銀杏館可長做長有。