上海婆婆 (黃大仙中心北館)

Open Now

Now Closed

朋友外遊回港，相約飯聚兼派手信，友人愛吃上海菜，上網search到黃大仙中心新開咗間「上海婆婆」，餐廳主打傳統上海菜，店內環境寬敞，裝修骨子，座位闊落，好適合同三五知己嚟聚餐。上海小籠包一籠有4隻，上檯時熱辣辣，外皮厚薄適中，入口有韌性，足夠承托住啲湯汁，肉餡用新鮮豬肉炮製，入口味道好鮮甜，點少少醋食，更添風味！砂鍋原條黃魚雲吞湯，黃魚原條上，兩面都煎到金黃色，魚肉鮮味幼滑，湯底鮮甜；雲吞大大粒，皮薄餡靚，飽滿又多汁。婆婆擔擔麵，揀咗唔辣，湯底有水準，入口充滿濃郁花生香。麵條Q彈有勁，順滑又掛湯，配埋鮮美嘅肉末一齊食，滋味滿分。甜品點咗客高力豆沙，即叫即炸，外皮脹卜卜，入口軟綿綿，充滿蛋白香，加上內裡甜而不膩嘅豆沙餡，絕對係誠意之作。