M&S Café (太古城中心)

Open Now

Now Closed

擁有超過一百年歷史嘅英國百貨店馬莎，近年轉攻食品市場，不過佢地仍然未夠喉，喺太古開設全香港首開café！ Café走簡約路線，設有64個座位，供應超過60種即席製作嘅美食及飲品，由早餐到午餐，甚至英式下午茶到晚餐都一應俱全，全部都係自家品牌嘅食物，任均選擇！ 而我首先就點咗個火腿芝士酸果醬法包，採用法式短包，配上淡味車打芝士同英國蜜味火腿，芝士屬於半溶狀態，入口柔軟，加上開胃嘅酸果醬、酸菜、酸瓜，別有一番風味。 因為英國曾經統治過印度嘅關係，所以唔少印度美食傳入英國，就好似呢個印度式紅咖喱雞肉配飯、烤餅及香芒甜酸醬。佢地選用印度式香米，黏度比泰國香米低，米粒較細長，帶半透明，食落爽口啲。雞肉微辣嫩滑，烤餅厚身帶口感，陣陣蒜香味，配上香芒甜酸醬，絕對一流！ 食完主菜，當然就到甜品！維多利亞式海綿蛋糕係一款經典嘅英式蛋糕，以香濃、扎實嘅海綿蛋糕為主體，用紅莓醬同淡忌廉做夾心，再灑上糖粉於蛋糕表面。有傳呢個蛋糕係維多利亞女王嘅至愛，下午茶必備嘅甜點，蛋糕亦因此得名同流傳開去。蛋糕鬆軟結實，足夠飽肚，夾心餡豐富，有雪糕口感！讚！