Video
Read full review
2010-10-29
23 views
一年前知道有呢間小店出現，「哈日」嘅我一直好想到來試下，可惜久而久之，慢慢將佢推到Wish List較後位置。最近友人突然提起，的起心肝到來朝聖一下，誰不知「相逢恨晚」呢句咁老套嘅說話又再出現，人生在世三十幾年，估唔到竟然在此刻食到如此令我感動嘅麵包，縱使小店位置較偏僻，而且路途甚斜，但果種一步一步走向幸福嘅感覺，值得跟大家一齊分享... 小店Bo-lo'gne位置近荷李活道已婚警察宿舍，如果識得去勝香園嘅朋友，沿著果條斜路一路直上就見到，雖然呢條斜路行完可能幾辛苦，或者正可以為大家個胃作好準備...Bo-lo'gne門外甚有日本住宅區內嘅咖啡小屋Feel，而鮮艷顏色嘅外牆加上旁邊的樓梯，望落相當舒服。內裡地方好細，只有十多個座位，假日必先預留座位。旁邊開放式廚房內，日籍老闆努力一邊為客人準備美食，一邊會望出來跟大家報以微笑，好一個溫馨又休閒嘅地方。簡單又精美餐牌上，除左著名嘅丹麥麵包做嘅三文治多士外，亦提供日本人最愛嘅意大利粉及日式咖喱飯，選擇上的確好適合花心嘅香港人。 Napoleon意大利粉套餐($70) - 整體賣相討好，酸酸嘅拿破崙意粉雖然份量唔多，但有一塊烘丹麥多士陪伴，加
小店Bo-lo'gne位置近荷李活道已婚警察宿舍，如果識得去勝香園嘅朋友，沿著果條斜路一路直上就見到，雖然呢條斜路行完可能幾辛苦，或者正可以為大家個胃作好準備...Bo-lo'gne門外甚有日本住宅區內嘅咖啡小屋Feel，而鮮艷顏色嘅外牆加上旁邊的樓梯，望落相當舒服。內裡地方好細，只有十多個座位，假日必先預留座位。旁邊開放式廚房內，日籍老闆努力一邊為客人準備美食，一邊會望出來跟大家報以微笑，好一個溫馨又休閒嘅地方。
簡單又精美餐牌上，除左著名嘅丹麥麵包做嘅三文治多士外，亦提供日本人最愛嘅意大利粉及日式咖喱飯，選擇上的確好適合花心嘅香港人。
Napoleon意大利粉套餐($70) - 整體賣相討好，酸酸嘅拿破崙意粉雖然份量唔多，但有一塊烘丹麥多士陪伴，加上半個奇異果，令人覺得豐足，假如換上營養價值更高嘅奇異金果當然更完美。Napoleon意大利粉屬日本式，除左少少火腿片之外，其餘都係蕃茄，青椒同蘑菇，醬汁略酸，未必適合每一位客人，麵身亦唔算Al Dente，整體味道不過不失。另外仲有明太子同Carbonara意粉作選擇，但主角始終都係果塊麵包，實在太搶眼喇！呢度嘅丹麥麵包來自日本京都，標榜包身折後有81層之多，所以入口特別鬆軟。事實真係如此，烘焗後外層酥脆，內裡異常鬆軟，牛油香味十足，非常非常好食。坦白講，我真係在香港未食過咁好食嘅麵包，如果大家知道有更出色嘅丹麥麵包，請告知本人！
博洛尼亞吉列豬扒三文治($70) - 先講豬扒部份，炸漿較多，而豬扒亦唔係優質材料，縱使唔算肥膩，相比之下，銀座梅林果份黑豚肉豬扒的確較為出色。但三文治麵包方面，博洛尼亞小店絕對輕鬆取勝，幾乎係無敵手可言，甚至將平平無奇嘅豬扒都可以變得好味起黎，Amazing！
日式碎蛋三文治($47）- 碎蛋部份做得相當討好，蛋粒跟沙律醬味道好協調，再加上超高質素麵包再一次成功搶鏡，好味程度自然爆晒燈！
香蕉焦糖多士($65) - 以前從來無諗過，香蕉跟麵包片兩樣平平無奇嘅食材，到底可以擦出咩火花，呢度加上焦糖後，有如月老將兩者結合，實在食得令人感動萬分。焦糖唔係稠密濃郁，甜度剛好，而香蕉就甜得自然，甜味滲入層層酥脆嘅麵包中，食落既有層次感又滿足，實在令我大開眼戒。下次到來，必要試一下呢度加上雪糕嘅多士，我有信心係另一個讚不絕口嘅美食！
如果食完丹麥麵包意猶未盡的話，呢度可以俾大家外賣拎走。同時亦有果醬同丹麥酥條出售，感覺有如一間小小日本麵包店一樣。大家就算唔係親身到來，亦可以到佢地嘅網頁訂購。價錢上雖然真係幾貴，但嫌我浮誇都要講一次，呢度賣嘅係全城最強最好味嘅丹麥麵包，所以呢個價錢絕對值得！
Post
