SAVVY

上星期搵咗間有情調嘅餐廳慢慢enjoy dinner傾吓計。太子酒店SAVVY係响海港城3樓，上網睇係超過8000平方呎，裝修時尚得嚟，佢又有酒吧又有餐廳。睇餐牌後最後都決定點二人套餐，因為可以試吓印度菜式之餘，仲有小食、餐湯、主菜等，真係超豐富，價錢一啲都唔貴，我哋慢慢享受咗三個鐘。小食就有素肉餃、蟹肉餅，加素菜湯，先開開胃口。素菜拼盤上碟時溫度keep住熱，我特別喜愛個印度薄餅，真係好鬆軟; 拼盤仲有豆腐、各式香料炒豆、奶酪同咖哩，香料味道好傳統，亦可配印度飯中和一下，感受到異國情調。食到呢度已經飽左一半，但主菜三文魚煎得好香，外脆得嚟肉質好juicy! 大啡菇鋪上芝士焗，蒜蓉菜心都炒得好香，中西菜式夾住食。再講多次，二人套餐都只係$798，仲有咁多嘢食，環境舒適，真係超抵！最後都忍唔住點多兩個甜品，藍莓芝士蛋糕、咖啡豆蛋糕(少許alcohol），精緻亦不太甜，為整頓晚餐劃上完美句號。