醋娘子 (Closed)

雖然我個人唔太食得辣，亦好少會專登搵啲辣嘢嚟食，但如果辣得好味都啱我心水。印度咖喱有唔少都辣得幾好味，中國有啲省份亦都將辣嘢整得好好食。上環始終人多消費力強，而租金無中環咁誇張，所以都養得起幾間物美價廉嘅川菜。『正宗雲桂川』係開得比較耐嘅，亦都比較獨沽正宗川菜，例如麻辣口水雞，涼皮同夫妻肺片。而『醋娘子』就做埋上海麵，辣度亦有所調整，適合普通香港人口味多啲，呢度嘅環境裝修亦比前者骨子。『干爆辣子雞』雖然睇落好辣，食落以香味為主。包括芹菜、辣椒同花椒令到啲雞肉又麻又香。$54嘅小菜客飯，價錢係無可挑剔嘅。