雞少去骨海南雞

Open Now

Now Closed

下午茶嘅海南雞飯餐，講到招牌當然試試佢。一個木盤盛住全個餐咁上，一碟雞、一個飯、一碗湯再加一碟三款嘅醬，排列整齊啱啱好。👍🏽雞嘅份量夠、唔知係咁啱好彩定係點、佢俾我嘅係雞肶肉、除左下肶嘅部份有連主骨外，其他雞件都係去左骨嘅，好易食👍🏽。雞肉非常嫩滑，好可惜嘅係無乜雞味😩 所以要靠返三個醬食番醬味。（7/10）飯有得揀白飯或油飯，食得海南雞當然要配油飯，油飯有均勻嘅淡黃色，但飯太乾身，飯粒分明，有d甚至偏硬😣油飯嚟講本人鍾意少少濕身、至起碼唔要硬，所以呢度扣分。（5/10）個湯餐牌上寫係住家湯，望落去似係椰子煲雞（唔肯定，因為無講，可能只係純粹嘅椰子湯），但飲落就剩係得椰子味無雞味，由於唔知佢其實係咩湯，所以無法評論。總之個湯味道唔算好。（3/10）另外叫左杯熱奶茶，茶底茶味幾好，飲落唔錯。可惜在d獨立包裝嘅砂糖受曬潮、結到一舊舊咁。雖然呢d唔算係餐廳食物出品，但會影響對食物嘅享受，餐廳管理有待改善。