Video
Read full review
2012-04-06
408 views
我幫襯「咖哩煲」o既lunch buffet, 斷斷續續已經有4、5年o既時間. 難得o既係咁多年o黎, 佢地o既buffet 一直維持o係 HK$88 o既價錢, 而食物o既款式依然豐富, 水準依然保持穩定. 所以咁耐以o黎都能夠keep 得住包括我在內o既一班舊客仔, 當然唔少得o係附近工作o既白領同外籍人士啦.見尋日星期四放假得閒, 一於早o的o黎食, 睇下佢地o的水準有冇變到.一入門口, 一條過o既buffet檯龍門陣依舊, 由左手邊數起放有炸物、 燒烤、是日餐湯; 中間o既沙律、薄脆、 甜品 (見上圖),到右手邊o既主菜、素食、同埋白飯/黃飯 (見上圖)先o黎是日主菜, 為方便影相我唔囉太多. 包括 (見上圖):孟買香料煮魚(Bombay Fish Masala) - 用串燒魚塊 (Fish Tikka) 做o既菜, 所以o的魚本身大件又入味. 汁裡面有一粒粒o既芥子, 唔太杰同太重味, 幾好食.牛油雞(Chicken Makhani) - 雞肉夠嫩, 用番茄同奶油做o既汁甜甜地又creamy, 送飯一流.印度黃飯(Pullao Rice) - basmati rice 煮得
見尋日星期四放假得閒, 一於早o的o黎食, 睇下佢地o的水準有冇變到.
一入門口, 一條過o既buffet檯龍門陣依舊, 由左手邊數起放有炸物、 燒烤、是日餐湯; 中間o既沙律、薄脆、 甜品 (見上圖),
到右手邊o既主菜、素食、同埋白飯/黃飯 (見上圖)
先o黎是日主菜, 為方便影相我唔囉太多. 包括 (見上圖):孟買香料煮魚(Bombay Fish Masala) - 用串燒魚塊 (Fish Tikka) 做o既菜, 所以o的魚本身大件又入味. 汁裡面有一粒粒o既芥子, 唔太杰同太重味, 幾好食.
牛油雞(Chicken Makhani) - 雞肉夠嫩, 用番茄同奶油做o既汁甜甜地又creamy, 送飯一流.
印度黃飯(Pullao Rice) - basmati rice 煮得o岩o岩好, 一粒粒, 有飯香, 用o既香料夠, 煮出o黎悅目又好味. 好過食白飯咁寡.
每位自助餐包一杯免費飲品. 我揀o左印度啤酒Kingfisher, 入口苦澀, 有啤酒o既味道, 無揀錯.
食完主菜冇耐, 伙記奉上印式烤餅(Naan)一件 (見上圖), 係新鮮熱辣o岩o岩烤好個隻, 上檯時已經一開二. 印式烤餅一定要新鮮熱辣即食至好味, 佢地做到呢點, 滿分! (註: 烤餅係可以食完再嗌o既, 只要同伙記down聲就得.)
跟著食o既係燒烤同炸物 (見上圖), 包括:串燒免治羊肉卷(Seekh Kebab) - 燒烤食品係「咖哩煲」o既強項, 而串燒免治羊肉卷係其中o既表表者. 切成一段段o既羊肉卷, 肉同香料配合均勻, 燒o既火候到家, 食落感到有汁水, 唔會乾掙掙, 所以咁耐以o黎我都好鍾意食呢度o既羊肉卷, 今次亦無令我失望!
串燒雞腿(Chicken Bara Tikka) - 一般o既Chicken Tikka係無骨o既, 呢個串燒Tikka係連骨o既細細隻雞腿一齊燒, 比一般o既Tikka冇咁多香料, 味道較溫和, 用o黎送飯都算唔錯.
炸雜菜(Pakora) - 見o岩o岩炸起就即刻囉黎食. 一件件切好o既菜件混埋雞豆麵粉o既炸漿o黎炸, 有o的似天婦羅. 其中食到一件係炸椰菜花 (下圖),
外皮都幾脆, 裡面o既菜同麵粉炸漿餡保持應有o既濕潤, 食時唔會又乾又粉. 抵讚! 咖哩角(Samosa) - 整得細細粒好嫡式. 外皮唔算鬆脆, 裡面o既餡係薯蓉同埋青豆(下圖),
味道唔係太突出. 呢個要扣分.
食完燒烤後仲有素食同沙律 (見上圖), 包括:印式薯仔沙律(Aloo Chaat) - 煮好攤凍o既薯仔切細粒, 拌以蕃茄, chutney同乳酪, 甜甜地又醒胃, 好味!.
葫蘆巴煮薯仔(Aloo Methi) - 薯仔粒加入葫蘆巴同薑絲同煮, 令整個菜散發出葫蘆巴特有o既香同味, 加埋薑絲味道非常好. 有機會o黎食晚餐的話, 呢味菜值得推薦!
青瓜沙律(Cucumber Salad) - 呢o的大路o野好在冇點出錯. 青瓜, 紅、白蘿蔔都新鮮同大粒. 拌以黑胡椒同沙律油, 味道適中, 唔錯.
炸薄脆(Papadum) - 捲埋好似個雪糕筒咁, 炸得比較厚身, 無一般薄身一片o個o的咁好食.
印式醃菜(Indian Pickle) - 印式醃菜係用未熟o既芒果, 青檸, 辣椒等加入醬料同芥子油醃製. 比起 Branto, 呢度o的醃菜鹹得滯, 又唔係好夠辣, 唔得, 扣分.
餐湯我冇飲到佢地o既是日餐湯(什菜湯), 而係揀o左另一款素食 - 香料煮扁豆 (Dal Tadka; 見上圖) - 當湯飲. 佢用料好足, 扁豆、蕃茄、薑絲、蒜蓉、辣椒樣樣齊, 味道濃, 辛而不辣, 天氣凍o既日子, 暖胃一流! 我飲o左三碗, 因為好好味.
最後輪到餐後甜品(見上圖). 今次有:雙米布甸(Kheer) - 用白米、西米、椰漿、糖同荳蔻煮成, 表面鋪上提子乾同杏仁片做裝飾 (下圖),
布甸唔太杰, 甜道適中, 有椰香味, 做到雙米布甸o既應有水準. 正! 我食o左兩杯. 鮮果沙律(Fruit Salad) - 全部新鮮材料, 好多奇異果、蘋果同密瓜, 消滯一流.
總結: 埋單連加一都只係 HK$97, 絕對低食. 加上佢地o既食物同服務水進一直都保持得咁好, 夫復何求?
Other Info. :
Buffet 檯o既佈置清楚利落, 每樣食品都放有名牌方便食客記認. 就選唔識, 老闆同伙記都會主動同樂意幫忙解答. 夠細心!
(The above review is the personal opinion of a user which does not represent OpenRice's point of view.)
Post
