LM Cafe (Closed)

聽朋友講觀塘呢間「LM Cafe」有live Band，去到門口已經見到好多人等緊位，入到去有卡位，仲有可以比多人坐嘅長枱，環境都幾寬闊。我哋坐低左就叫咗個「牛奶炒蛋」同埋「瑞士雞翼」試吓。「牛奶炒蛋」好大件，咬落去非常有口感；「瑞士雞翼」好入味，而且肉質好「林」。之後我哋再叫左一個「蛋奄列炸魚柳意粉配龍蝦汁」，意粉好大碟非常足料啊，而且炸魚柳非常大件，食落去口感脆卜卜，好惹味，意粉再配埋龍蝦汁一齊食，好match。「西冷牛扒香草腸仔鐵板餐」配以餐湯「蘑菇湯」，再加埋我最鍾意飲嘅「熱鮮奶」，好豐富呀。「牛扒」切落去好鮮嫩嘅肉質；「牛奶」飲落去個胃好舒服。由於我比較鍾意食辣，所以我哋叫咗個「麻辣肥牛米線」，果然不出我所料，麻辣嘅味道足以令我嘅嘴唇麻痹了，不過好刺激，而且牛肉好新鮮，咬落去肉質鮮嫩，滿口牛肉味道，不錯。食雞翼唔夠喉，我哋叫多咗碟「蜜糖雞翼」，「蜜糖雞翼」望落去賣相非常吸引，而且成碟都係蜜糖醬汁，好特別嘅蜜糖味道。「雪糕紅豆冰」有我最鍾意嘅雲呢拿雪糕係上面，飲落去消暑解渴，正。食咗咁多野都係三百幾蚊兩位，價錢合理，位於觀塘工廠區附近，難怪放工一族都會來呢度食晚餐。