櫻木 (Under Renovation)

餐廳位於灣仔，座位闊落，坐得舒服，幾適合情侶拍拖，同朋友聚會又唔會太嘈，方便傾計。第一次係香港食omakase,依間算係比較平。叫左$580嘅set。其實omakase就好似法國菜咁每碟份量不多，食完一道，之後先上第二道，可以慢慢品嚐。第一道係海蜇同芝麻醬菠菜。芝麻醬好香濃，同鮮嫩嘅菠菜好夾，食落好清新。牡丹蝦爽滑彈牙，蝦頭仲有好多膏。油甘魚好肥美。拖羅入口即溶，充滿脂香，不過調味重手左啲，加上紫蘇葉，搶左啲鮮味。味噌煮牛肉好韌又有筋，麻麻地。三文魚軟骨漬物,第一次食，口感爽脆，酸酸地好開胃。特別推薦左口魚同帆立貝，前者充滿脂香，後者亦夠鮮甜。不過壽司裏面嘅wasabi落得太重手，好嗆，蓋過本身魚嘅味道。吞拿魚手卷，碎吞拿魚好香滑，都幾足料。紫菜豆腐湯，較為清淡。最後以芝麻雪糕作結，都幾濃，唔會太甜。總括黎食物較為普通，但係如果想試下omakase都可以體驗下，服務都唔錯，會介紹每道菜又不停加茶。