松山素食 (Closed)

嗰日Day Off放假，去上環搞少少文件嘅手續。大概去到11:30到，開始肚餓，就周圍搵吓有咩食啦。因為前幾日食得好飽，好油膩，就想搵啲輕食食下，點知真係行過見到一間素食，仲要好平好優惠。因為最近疫情，大家都唔敢坐低係餐廳食飯。而呢一間松山素食亦按照呢一個風氣，停止咗堂食嘅部份，只供外賣。自己外賣帶走都係30幾蚊一個餐連湯，上環呢一區來講算係好抵呀。因為我一陣會見到我屋企人，所以我買咗兩份餐。成間舖頭好企理，好乾淨，完全唔同平時見到嘅兩送飯三送飯嘅茶餐廳。出邊望入去大玻璃見到好清晰嘅餸菜，都有成十幾款！最特別嘅係佢有一個係比較西式啲嘅沙律，我好鍾意佢有呢個選擇啊！所以我都加咗一個沙律俾我屋企人。我叫咗兩盒三餸飯，總共有六個唔同嘅餸。我送埋一款好特別嘅紅菜頭湯，入邊有粟米有番薯㗎！老闆仲好好人添，佢同我講今次個外賣盒仲係用緊舊款，嚟緊有一款新嘅外賣盒，會係分開兩三層好似嗰間吉吉牛肉飯咁。咁仲可以防止啲汁滲晒落啲飯到添！整體味道唔錯，一啲都唔馬虎，我最鐘意個炒蛋，覺得好滑好嫩。屋企人就話好鍾意個紅菜頭湯，出邊好少見到有呢一款湯飲㗎。另外就係好欣賞嗰個咕嚕肉，味道啱啱好，唔使食肉又食到咕嚕肉