Hot Pot 熱‧海鮮火鍋私房菜 (Closed)

因為表弟喜歡食海鮮，所以今晚特別約佢去試一個熱鍋二人海鮮火鍋套餐，食材當然最重要。首先有三文魚刺身四件，夠厚身，味道又夠鮮美。跟住我地揀咗胡椒老壇酸菜白肉鍋做湯底，爽口嘅白肉及好多嘅酸菜，增加咗酸度，惹味非常。將手切安格斯牛小排放進鍋內，好快就熟，有香濃牛肉味，鮮嫩可口。炸魚皮一灼就食得，唔使等，酥脆好味。手打蝦丸爽口彈牙，食得出新鮮蝦味。鮮蝦水餃皮薄餡多，一試令人回味。Q Q粉放落湯裏面，不消三兩分鐘就變透明，吸收咗湯汁，真係Q彈㗎！最後將雜菇拼盤全部放入鍋內，慢慢煮軟熟，格外淋甜美味。仲有主角要出場，話明係海鮮船，新鮮材料就唔少得，計有鮑魚兩隻、元貝兩隻、蜆四隻、蝦兩隻及白鱔片四片，份量十足，鮮味一流，無需蘸任何調味料都食得津津有味。奉送飲品揀咗芒果沙冰及提子沙冰，冇諗過係咁大杯，冰凍有果味，飲落解膩之餘，仲平衡咗火鍋之熱氣 。如果唔食火鍋，餐廳其實仲有小菜供應，任君選擇。卡位夠舒服！