住家菜 (Moved) New Location

元旦日一家人圍枱食飯，食D簡簡單單嘅家常小菜。一諗起"家常小菜"就想起去呢度...小菜每碟只係平均四五十大洋。叫個十碟八碟，都只係五嚿幾六嚿水，實在便宜得發笑...叫到一枱都係--- 阿嫲雞及鹹魚茸煎肉餅係上次食過嘅，都保持水準。雞雖肥咗一D，但肉頗滑；煎肉餅薄薄一片，鹹鹹香香頗惹味，用嚟送酒一流...其他之前未試過嘅餸水準有點參差--- 沙律蝦球普普通通，蝦幾爽口，但過濃嘅沙律醬完全蓋過蝦嘅鮮味，而且作為伴菜嘅生果竟然有提子，感覺係相當奇怪；雜菜煲夠足料，蝦乾大大條，抵食；老虎班蒸得骨肉剛好分離，肉質夠滑。$198一條唔算貴嘞；蜜糖豬扒蜜味不足，豬扒有用鬆肉粉處理，鮮味全無，係相當失色嘅一碟...十碟餸再加兩煲湯，九百多大洋。响尖東中心地帶，去邊度揾到咁平?如果有，請相告...