蟹仙海鮮蒸氣鍋 (Closed)

每次講起食海鮮，大家都會諗起西貢或者流浮山近海既地方，但原來元朗都可以食到靚海鮮，因為呢間蟹仙嘅老闆係海鮮供應商，每日都有海鮮由唔同地方空運到港，所以會親自揀返最靚海鮮送去餐廳。由於每4個人會送甜品，所以我地約齊4個人出發。之前上網見到個個都食到飽飽走，所以我地BOOK左5:00PM，等食完之後可以多少少時間周圍行下消化左先返屋企。估唔到5:00已經有客，仲要係外藉遊客特意黎食，果然名不虛傳。我地叫左$298套餐，一開始首先店員幫我地落個南瓜粥底。第一道就係澳洲青年龍蝦，色澤通透咬落亦都啖啖肉，極爽口彈牙！第二道上嘅係越南頂角膏蟹，一放上枱已經見到勁肥美爆多膏，食落更啖啖膏味！其他海鮮例如紐西蘭青口、紐西蘭蟶子皇、貴妃蚌、深海龍躉片、鮑魚同海蝦都非常新鮮，啖啖肉，保證食到停唔到口。食飽仲有一個蔬菜籃消下滯，然後再食一開始既南瓜粥底。四人同行會送椰汁官燕燉雪燕，最岩女士滋補一番。