麴町 (Closed)

超多口味章魚燒，即叫即燒！我好鍾意食章魚燒～麵糰外脆內軟，加埋章魚粒、蛋黃醬、燒汁同木魚碎，趁熱食，少少辣咀嘅感覺真係無得頂 今次我就試咗元朗一間我大愛嘅章魚燒「麴町道場」！ 呢間街坊小店，位於昌發樓及安福大樓之間嘅橫巷，幾唔顯眼，真係經過都唔多覺佢存在嗰隻。不過，我因為支持黃色經濟圈嘅關係，前排就特登搵嚟試～結果一發不可收恰！一嚟呢度嘅章魚燒係即叫即燒，真正「新鮮滾熱辣」；二嚟可以揀黑松露、明太子、蜜糖芥末、芝士、蟹籽、蔥味及原味等唔同口味，真係揀起上嚟都選擇幾多；三嚟我鍾意呢度章魚燒嘅口感，外層燒得夠香脆，入面軟滑，加埋大粒章魚及蔬菜，爽彈有嚼頭！ 黑松露章魚燒 HK$28／4粒；HK$34／6粒 明太子章魚燒 HK$26／4粒；HK$32／6粒其中，我至愛就係黑松露同明太子口味，無諗到黑松露陣味咁濃烈，同燒汁、蛋黃醬撞埋一齊，竟然幾合拍，食完口腔仲有陣陣類似大蒜香嘅味道，令我有啲難忘；至於明太子味，鹹鹹香香為主，帶微微辛辣口感，個人覺得幾惹味，唔錯。另外，呢度可以order 4粒或6粒盒裝，我就鍾意揀兩隻口味，各叫4粒，一盒8粒，當一餐正餐就剛剛好！喜歡章魚燒一定不可錯過