韓奶奶拌飯

Open Now

Now Closed

韓奶奶拌飯開左喺元朗好幾個月，主打韓式釜飯嘅餐廳！身為元朗人終於過黎試下。主打嘅韓式釜飯有多款口味，仲有秋冬限定嘅釜飯選擇。每份釜飯嘅份量都唔細，仲有3款韓式小菜、通粉沙律同埋湯！除此之外，menu上仲有好幾款韓式小食可供選擇添。今次就點左餐廳招牌之一嘅特級牛頸脊拌飯。食之前加入秘制照燒汁，再連同釜飯入面嘅生蛋黃、香蔥、牛油、芝麻、燒牛頸脊粒等配料拌勻就食得。拌勻後嘅釜飯好香口，照燒汁嘅甜同牛頸脊嘅牛脂香都突出，味道上好惹味。特別中意釜飯入面嘅雜菌！釜飯底部嘅飯焦都好脆口又好味。另一款釜飯點左秋冬限定嘅炙燒厚切鰻魚拌飯。中意食鰻魚嘅唔可以錯過呢一款！有5塊鰻魚，每塊果然都好厚切，而且口感好爽脆又彈牙。雖然味道上牛頸脊釜飯會惹味同濃味啲，不過呢個都唔錯。另外，仲試左兩款呢度嘅小食。炸薯餅有驚喜！同平時嘅炸薯餅唔同，呢度嘅薯餅口感係一絲絲薯絲。上面嘅雪花芝士乳酪醬芝士味好香，但又唔會太濃太膩。炸珍寶生蠔好飽滿！外脆內嫩又鮮甜。