Kay Restaurant

Open Now

Now Closed

元朗雞地越來越多餐廳，呢度嘅餐飲業競爭都幾激烈。喺食肆林立嘅鳳攸南街，最近就去左其中一間食西餐嘅Kay Restaurant。去嗰日臨近萬聖節，餐廳入面仲有萬聖節嘅佈置添。晚餐時段有Dinner set menu選擇。每份晚餐有鮮果雜菜沙律、餐湯配蒜蓉包同埋自選主菜。鮮果雜菜沙律。份量都幾大而且唔馬虎，新鮮水果配沙律菜，再淋上水果蓉同醬汁，充滿果香清甜，好refreshing。是日餐湯係蘑菇湯。菇味好重，配蒜蓉包絕配！主菜揀左蒜香檸檬牛油烤焗盲曹魚。即叫即焗嘅盲曹魚上檯熱辣辣，已經聞到好香蒜蓉味！盲曹魚焗到外皮微脆，魚肉滑溜有魚味，配蒜蓉牛油好香口惹味！伴菜嘅蕃薯蓉好甜！另一份主菜揀左香蒜辣椒伏特加海鮮扁意粉。意粉好滑，軟硬度適中，個汁有海鮮嘅鮮甜味同淡淡蒜蓉香氣。伏特加嘅味道唔算好突出，但係佢更加帶出海鮮本身嘅鮮味。成個配搭唔會好油膩，食完成份都無咩負擔！最後叫多份甜品作結。呢度有唔同口味嘅梳乎厘選擇！點左香橙，即叫即製製作需時，所以都等左一段時間。梳乎厘有淡淡嘅香橙清香，不過入口反而比較接近柑橘味，梳乎厘口感唔夠fluffy，比較似蛋糕嘅口感，同埋中間空心所以同想像中有啲落差。