湕承 · 台式便當

Open Now

Now Closed

朋友喺金鐘返工，lunch成日唔知食乜好。今次我就上網search左呢間台式便當，見到餐廳今日12月24號係幫兒童院義賣，價錢又幾抵，就買埋比朋友一齊食。🐮牛肉壽喜燒湯燉讚岐烏冬 $68可以免費追加烏冬半份，因為知道我哋嘅食量都比較大，所以我哋兩個都加咗半份烏冬。湯底都幾清甜，牛肉都幾多，應該都有成八九塊。烏冬彈牙，仲有幾片紅蘿蔔同埋娃娃菜，感覺健康。🐷烤台灣腸·烤花枝丸·滷蛋肉燥乾拌讚岐烏冬 $68有兩粒花枝丸、六片台灣腸、半隻滷蛋、一堆酸菜同埋一堆青瓜粒，材料豐富。再加埋肉燥，撈落個烏冬到，食落相當有滿足感。肉燥嘅醬汁相當濃稠，味道偏甜，相當夠味。加左半份烏冬之後，份量十足，一定夠飽。台灣腸同花枝丸都烤得好香，食得好滋味。🥬蒜蓉炒椰菜每個套餐都可以揀一份小食或者一杯飲品，我地兩個餐都揀左蒜蓉炒椰菜。椰菜唔會有太多油，又蒜味十足，充滿台灣嘅味道，好正。一餐入面有烏冬又有肉又有菜，感覺營養均衡。其實我覺得一間餐廳願意喺平安夜，將自己全數嘅現金收入捐贈比兒童院，係一件好有意義同埋值得鼓勵同支持嘅事。加上味道又唔錯，我諗我以後都會多啲買呢間嘅便當。