Stormies (Closed)

食晏有買一送一，飛身入去坐定定，叫咗羅勒番茄水牛芝士意大利飯，同美國牛肉漢堡拌車打芝士洋蔥配薯條，是日餐湯係南瓜湯，跟餐甜品有 Panna Cotta。由於鍾意食水牛芝士，所以一見到個飯有咁多芝士，水晶眼閃閃發光！湯汁份量收到啱啱好，同上次喺沙田食嗰個湖上泛魚版真係兩個世界。呢個芝士飯味道唔濃烈，食吓食吓好易清晒。如果飯粒煮得生啲更好，不過唔係個個鍾意食硬飯。牛肉堡塊肉厚身得嚟細細件，食落有肉汁；蔬菜夠爽鮮脆口。兩者嘅份量做到平衡，令成個漢堡睇落夠高大，加上包身經微烘，整體好養眼，味道就正正常常咁啦。配菜炸粗薯條係連皮版極品，可惜燶咗啲，但最終都食晒。飲埋杯勁多檸檬嘅熱茶，再食埋細細杯少糖甜品，胃腩即時現形。摸住肚皮作順時針打圈，感覺好幸福。