大丼家 (Closed)

食開果區食到悶，啲人成日話筲簊灣多小店，就開始過來搵食。大丼家嘅位置都算易搵到。星期五晚市都叫剛剛好唔洗等位，但就要搭枱。店內環境係和風快餐店，咁啱我哋兩個人坐咗六座咔位嘅單邊，就好夠空間。第一次去嘅舖頭，盡可能都要點啲店長推介，主廚推介 (成日唔記得，撞過好多次板架嘞)，而大丼家有個叫 "元祖" 燒牛肉飯，當然要試。元祖燒牛肉飯($46)：呢個價錢同環境，好難唔將佢同吉野家比較。一上枱，嘩！好大碗！啲飯係珍珠米，但就無乜配菜，唔健康。牛肉份量比吉野家多，肥膏卻比較少，肉質又唔靭。因為係燒嘅，香口，但就比吉野家嘅煮牛肉較油，而啲油混雜燒汁連飯都有，喜唔喜歡好視乎個人口味啊！芝士燒牛肉飯($54)：一上枱，嘩！啲芝士非常香！外子話好味，下次要試芝士三重奏噉話。日式餃子($12/三隻)：上枱啲餃子浸喺啲汁上面，真係第一次見，噉其實即刻食又無咩影響嘅。皮唔厚亦唔算薄，肉菜比例正常，整體普通。我仍然比較喜歡麵屋武藏嘅餃子。雖然係快餐店裝修，但可以座底睇餐牌。致於埋單就要出櫃檯。