韓牛牧場 (Closed)

平時食韓燒總是覺得好heavy，油淋淋，食完仲成身味，頭髮更加係重災區，有時要洗兩次先搞得掂。不過呢間燒肉就解決咗以上問題，因為採用咗光波爐，大大減少油煙，油都唔洗落，罪惡感減少好多。我地揀咗世子牛盛放題，部分食材是只出一次，一坐低唔洗叫。包括刺身拼盤、海鮮拼盤、安格斯牛肉盛合及醬油蝦，已經相當豐富。刺身拼盤 - 一大盤刺身放得整整齊齊，鮮甜美味，同其他主打日式放題店質素有得揮。海鮮拼盤 - 欣賞餐廳扇貝上枱已加入蒜蓉；青口亦附有牛油在殼邊~ 放上爐燒無咁單調。安格斯牛肉盛合 - 雖然唔太識分咩部位，不過全部油花分佈都幾靚仔，肉汁夠唔靭。醬油蝦 - 比無醃個款蝦多咗個層次，是另一種風味。其他以QR落單，除咗燒肉，仲有刺身、壽司、天婦羅、炸物及主食等選擇；任食肉類無論牛、豬、雞肉類都不錯，尤其是雞睥肉，非常彈牙多汁。壽司只點了火炙韓牛壽司，牛肉嫩滑之餘，下面舊飯都有醬汁添。熟食方面就最鍾意韓式炸餃子，比坊間辣一點，好惹味，encore咗兩次。另外自助區有沙律前菜、包肉既生菜、三款熟食雞翼及三款湯品。椒鹽單骨雞翼幾特別，其他放題應該好少見到。最後食埋支Melona雪條，非常飽足!!