村上居酒屋 (Closed)

又發掘到朗豪坊附近有新既日本餐廳，呢度既午市套餐相當抵食，而且仲免加一，食物質素仲要係高質，選擇亦好多，真係好有驚喜。我同朋友都係要左壽司定食，兩份都有前菜沙津，味噌湯，細烏冬同甜品忌廉泡芙。先講下個烏冬，跟餐既烏冬黎講算係好有誠意。湯底係豬骨湯，加左少少黑蒜油味香味大提升。烏冬本身都好彈牙，加埋大量爽口既木耳同荀，一小碗其實唔係好夠。而主菜方面，我個份係全部壽司既特上壽司定食。一共有8件手握壽司配3件吞拿魚蓉小卷。所有壽司都十分新鮮，連平時我唔太愛既白身魚都好鮮甜，完全唔腥。重點既海膽壽司簡直係令人回味，海膽味濃，少少腥味都冇，質感creamy，配埋脆脆既紫菜，味道一流。而朋友要左刺身壽司定食。雖然只有6件手握壽司，而且冇左海膽壽司，但有5件厚切魚生刺身。厚切三文魚魚油豐富，非常軟滑，同樣滿足。總括來講，喺旺角區用平過連鎖壽司店既價錢，就可以食到高質既壽司定食，真係值得一試。