糧心製作 (Moved) New Location

為左造福黃竹坑既朋友仔，我決定寫多啲關於黃竹坑呀香港仔既餐廳，等大家唔會中咁多伏。星期五當然要食得開心啲，何況黑色星期五，食外賣都要食high d。今日黎到呢間糧心製作，晏左少少，12點50先上到黎，結果等到1點30先拎得呀陰公我叫左個紅酒煮牛肋飯，要湯，外賣係減5蚊既，所以65蚊。 外賣個portion望落係好似好細，但食落係飽架。牛肋肉有五舊，煮得好好食，好冧，好入味，側面都有啲紅蔔白，洋蔥同橄欖。叫左carrot soup，少少酸，用咖啡杯裝住。等既期間見到佢地啲牛扒羊架好出色，都係貴十幾廿蚊左右，下次早少少訂枱黎堂食先。