聚味軒 (Closed)

對九龍城的印象，仲停留喺泰國菜，基本上想食泰國菜首選都一定會嚟九龍城，但原來呢邊都有好多中菜餐廳，見想食嗰間泰國菜冇開，就試吓呢間中菜，餐牌上面選擇好多，大部份都係我愛嘅菜式。《聚味鹹香雞半隻》$138類似鹽焗雞嘅味道，但唔會好鹹，食起嚟都好香，又唔會好重雞蘇味同冰鮮味，重點係雞肉好滑，好好食。《一口欖角骨》$88超推薦！分量多之餘，價錢真係唔貴。外面好酥脆，少少甜味，而入面既排骨肉肉都好有肉汁，口感一流，令人越食越想食。《冰鎮生炒骨》$147之前已經食過冰鎮嘅生炒骨，感覺都幾好冷熱交融，而且生炒骨食起嚟會更加爽口，不過略嫌太甜太多糖漿，食的時候黐埋一舊分唔開，如果改善下就會更好。《真功夫炒飯》$88大大碟炒飯，好有鑊氣，粒粒分明，飯粒不會黏在一起，硬度剛好又夠味，雖然配料不多但已經十分好吃，推薦！ 總括來說，呢間中菜環境不錯味道又好，重點係價錢都算親民，經過九龍城打算食中菜的話，呢間會係一個幾好嘅選擇。