鴻運泰國美食 (Closed)

蘭桂坊除左西餐之外，原來仲有間泰國餐廳。平時行過有條橫街見到有人可以吸水煙，再行入d轉個灣就見到，就坐低試下。有露天位，但我地當然係揀室內卡位，可以坐得舒舒服服。食親泰國菜必點生蝦，碟蝦上枱果陣好有驚喜，首先有成十隻蝦，夠曬多，而且隻碟都好靚。生蝦新鮮爽口，個汁仲要唔太辣，我食得到，太好喇！再黎個泰式小食拼盤，有四款小食，蝦餅最好食，外層脆卜卜，入面嘅蝦肉好彈牙。春卷都好食，最鍾意入面有我至愛嘅粉絲，春卷皮炸得夠脆。香葉包雞嘅雞肉就乾左d。炒椰菜苗望落綠油油，食落夠蒜香味又夠爽口，炒得好。粉絲蝦煲d蝦味道一般，最正係夠多粉絲，我真係好鍾意食粉絲。