紫蝶花 (Closed)

原本諗住食韓國菜，原來搬咗，行行吓先知呢間商場1樓有幾間食肆。行過呢間餐廳就比職員嘅推介停低睇餐牌，原來係星馬泰餐廳，都幾多種類，價錢又Ok。職員熱情咁招呼我哋坐低，我哋三人點咗一個午餐三個下午茶餐，食物同飲品味道唔錯，除咗海南雞係最麻麻，整體感覺幾好似，職員有禮，座位又唔會逼，價錢味道都幾滿意。午巿套餐：新加坡海南雞飯(配雞油飯，老火靚湯)，一嚟見到雞肶當然開心啦，再睇見雞肉太熟，食落雞就唔鞋，但無雞味，無肉味，要點薑蓉或海南雞醬食。湯係青紅蘿蔔湯，味精唔算多，飯可以揀油飯或白飯，飯都可以，算乾身淡淡油香味。茶餐：班蘭咖央西多士，都係例牌叫西多士做小食，無斑蘭味，不過牛油可以好均勻咁溶喺西多士面，因為呢排食嘅西多士都係溶唔晒，所以我覺得無餡都Ok嘅。下午茶餐：迷你泰式豬髀飯，豬髀入味又勁淋，入口有溶嘅感覺，汁料另上，自己調教，唔怕太鹹或太少，好味。南洋椰汁芝士魚柳焗飯，魚柳都有三塊，芝士汁夠味，但唔會過鹹，啱啱好。凍飲+$4特飲+$10鮮牛油奶昔，好味，唔漏，奶味唔重，口感豐富。特飲+$10椰蝶花椰汁特飲，顏色好靚，不過甜咗啲。