81手工餃子

Open Now

Now Closed

呢兩年呢周圍都有好多好多嘅餃子店，基本上大家賣嘅嘢口味都係差唔多㗎啦。有唔同嘅話，大部份只係湯底之別。今日幫襯呢一間餃子店位於喺元朗雞地附近，要喺呢個位生存都真係有啲難度。隔離附近就有元朗最出名嘅台灣羅東肉焿番、潮興清湯腩、合興車仔麵。呢幾間都好好食，有一定水準，不過羅東就唔係咁啱我口味！呢間係名副其實嘅舖頭仔，只可以容納大約6人。廚房係開放式，見到有兩個人喺入面包緊餃子，另外有一個人咩幫手落單之後都入去煮。今日分別叫咗韭菜豬肉湯餃、芹菜豬肉湯餃，及白菜煎豬肉餃。餃子都係一般般大小，當然唔會好似雲吞咁細粒啦。第一口當然試下個湯底，好清淡，食開重口味嘅人一定要加調味料。芹菜餃都足料，好清新！煎白菜豬肉餃，睇個樣都靚嘅，脆卜卜好老實講，當我食完韭菜豬肉湯餃嘅話，我再食白菜餃時，根本就覺得完全冇味嘅。我唔知道係前者味道太濃，定係呢款太清淡？可以肯定嘅係呢間舖頭一啲味精都唔係好重，食完一啲口渴嘅感覺都冇，而且都好屬於自家製，因為感覺上係比較輕口味。