功德林上海素食 (世貿中心) (Closed)

星期六一行十三人訂左呢間素食，七點半去到，己預留左張大枱喺房比我地，原本感覺唔錯，但等左5分鐘都冇人招呼，連茶都冇人開，終於用左十分鐘先開到茶，跟住想揾侍應寫餸，但房裏面係冇侍應嘅，唯有自己行出去揾啦，到同佢講要咩嘅時候，佢就同我地講我地咁多人叫餐抵D，但我地回應食多D種類，佢依然話餐抵D，咁我地話再睇睇先，睇完因餐得8款餸所以我地都係想散叫，咁又再走出去揾侍應寫餸啦，點知呢個侍應又係叫我地食餐😤一路同佢講要散叫佢一路唔寫，最後我地唯有叫左個$2880餐，搞完一輪終於有嘢食嘞，首先嚟左個拼盆，都幾大份，當中有個脆鱔味道都唔差，甜甜地有D脆，但個芋頭魚就好差，D芋茸好假，唔好食囉，不過個咕嚕肉整得好似，咬落以為真係食緊肉，另外可能餐關係冇咩好食，只係樣樣都大大碟，唉！下次真係唔會再食餐😂