JK Brother’s (Closed)

大廈左右兩部𨋢都上到呢間放題。周末晚五點準時食頭圍，限兩小時，付款只收八達通或現金。見餐牌嘅湯底選擇，居然有選擇困難，侍應推介壽喜燒…及後發覺出事，湯底唔係普通甜，係特甜！所有冬菇、魚腐、肉丸之類，浸超過5分鐘，撈起送入口全部得番啲勁甜䜴油味…冇哂食物本身味道，自調嗰兜生蒜蔥醬油完全派唔上用場…只有鮮肉片類或響鈴、炸魚皮因灼嘅時間短先冇咁受影響。落單留意1係指一片非一碟，魚生切得比平常一般食嘅短同薄一半，間中嚟嘅三文魚刺身肉質有啲散，赤貝唔係新鮮即開較似雪藏，件頭較細，魷魚螺片類刺身頗靭。雪糕建議都係攞moven 就好，雖然只有士多啤梨味但品質保證，另外那個叫咩大阪雪糕（香港造），攞左薄荷味，食落去似食第一啖綠箭香口膠、朱古力味似雀殘嗰種味。叫做有樣嘢食落醒神啲，係個芝士撻，食到咁飽，才食都覺得好食，甜度適中，有少少流心，軟滑。好多食客話侍應態度麻麻，還好我遇到個妹子侍應幾有耐性幾殷勤，我哋煩佢多次喺咁問問題佢都冇西面，叫做加番啲分數。但回家仲係覺得鞋口鞋脷，嗰個壽喜燒真係硬傷…