Video
Read full review
2014-09-21
221 views
年初到訪過尖沙咀金巴利道嘅韓式烤肉店「喜來稀肉」，主打一隻成年豬只有200-300克嘅護心肉，以及爐邊烤蛋，覺得美味又獨特，當其時都可講得上城中獨賣。早前，又見到另一新店，被喻為韓國No.1燒肉嘅「新麻蒲」，落戶銅鑼灣，故嚟到新麻蒲就喺想再重溫一下護心肉嘅美味。迎門口一個大招牌，正正講出何解No.1，皆因全球分店總數超過480間，遍佈中國、東南亞及美國，單單韓國本土已擁有430多間分店（註：喜來稀肉晌韓國本土則有230多間），絕不能小覷佢嘅規模，果然喺市場佔有率之冠。喜來稀肉個環境有種年輕、不拘小節嘅感覺，石屎牆身、水泥地下，基本上無太多裝修，並以圍爐圓枱居多；然則，新麻蒲都有點相類似，水泥地下、仿紅磚牆，不過，就以4人卡位為主，坐得較舒適，最特別每個卡座頂都置有光管，感覺較為摩登，而爐頂又有個煙囪連波形吊燈，刻意聚光於爐上，非常有心思。個煙囪又可以伸縮，故此，抽風效果都可以，食咗成晚都唔覺煙霧彌漫。翻一轉餐牌，其實跟據之前食韓燒嘅經驗，大抵都知道個情況。第一版就介紹護心肉嘅效能，而選擇不外乎豬肉類、牛肉類、主食類（飯麵、熱鍋）、特選料理（壽司、年糕、煎餅）、酒類、飲品及韓冰。一向食有
迎門口一個大招牌，正正講出何解No.1，皆因全球分店總數超過480間，遍佈中國、東南亞及美國，單單韓國本土已擁有430多間分店（註：喜來稀肉晌韓國本土則有230多間），絕不能小覷佢嘅規模，果然喺市場佔有率之冠。
喜來稀肉個環境有種年輕、不拘小節嘅感覺，石屎牆身、水泥地下，基本上無太多裝修，並以圍爐圓枱居多；然則，新麻蒲都有點相類似，水泥地下、仿紅磚牆，不過，就以4人卡位為主，坐得較舒適，最特別每個卡座頂都置有光管，感覺較為摩登，而爐頂又有個煙囪連波形吊燈，刻意聚光於爐上，非常有心思。個煙囪又可以伸縮，故此，抽風效果都可以，食咗成晚都唔覺煙霧彌漫。
翻一轉餐牌，其實跟據之前食韓燒嘅經驗，大抵都知道個情況。第一版就介紹護心肉嘅效能，而選擇不外乎豬肉類、牛肉類、主食類（飯麵、熱鍋）、特選料理（壽司、年糕、煎餅）、酒類、飲品及韓冰。
一向食有質素嘅韓燒都唔平，細細碟韓牛，逐碟逐碟計，唔經唔覺個人消費都三幾百落樓。難得店家有提供套餐，可以食得划算一點。6款套餐，有淨食牛肉或淨食豬肉，又或有牛又有豬，套餐份量有大大細，適合2人（$368-$548）或3-4人（$668-$698）。以SS6套餐包嘅種類就最多樣化，3-4人份量，有牛，有豬，又有特選什錦拼盤，下面再慢慢介紹有啲咩！
韓國菜其中一個特色，就喺食乜都會餐前送來三幾款冷盤前菜，韓式泡菜喺指定動作，其次仲有漬醃蘿蔔及甜辣醬大豆芽伴蔥絲。泡菜夠辣夠狼，蘿蔔清甜無渣，大豆芽酸爽開胃，幾款前菜都有水準，又各有特色。
此外，仲奉送一份黑芝麻醬田園沙律，沙律菜新鮮爽脆，內裡仲有火龍果及車厘茄，配上自家製黑芝麻醬，味道幾特別，烤杏仁片更有畫龍點睛之效，唯獨個人覺得黑芝麻醬做得稀一點效果應該更好。
除咗前菜、沙律，食韓燒仲有幾樣配料好重要，新鮮生菜用嚟包住啲烤肉食，既清爽又去油膩；嫌齋包生菜寡啲，加啲青瓜粒、豆辦醬又點睇？如果唔怕油膩，又想肉味重啲，大可試試沾少少青辣椒洋蔥醬油嚟提味，感覺肉味更濃。
SS6套餐 $678食物包括有：牛霜降肉（120g）、新麻蒲秘製牛五花肉（150g）、新麻蒲護心肉（150g）、新麻蒲五花肉（150g）、特選什錦拼盤（年糕、蘑菇、豬肉香腸、大蝦）、火炙霜降牛肉壽司4件，美觀實用嘅三層架盛載所有食物登場。
未烤肉，店員先為客人注入蛋漿於烤爐外圍嘅坑邊，製作爐邊烤蛋，因為唔喺第一次食，所以心裡有數，知點搞。其實烤蛋都要幾長時間慢慢烘，大概食咗一半烤肉嘅時候，啲蛋都OK嘞。比起上次晌喜來稀肉食嘅（坑邊分開3截，1/3喺原味，1/3加有少許泡菜），新麻蒲嘅蛋漿就加入咗好多泡菜，蛋香依然濃郁，但多添幾分惹味及辛辣，若烘得啱火候，烤蛋入口軟綿綿，否則過老會變得嚡口。萬一失敗唔緊要，玩多次無妨，但添蛋漿每次收費$28。
上層（年糕、冬菇、金菇、雞肶菇、豬肉香腸、大蝦）大蝦夠新鮮，鮮甜彈牙喺意料中事，而冬菇、金菇、雞肶菇燒完口感柔韌，菇香滋味，豬肉香腸亦都唔錯，唔似得啲平價雞肉腸成日出現過鹹嘅現象；不過，最估唔到喺啲年糕，燒完都仲喺咁硬，真奇怪。
中層（霜降牛肉、秘製豬頸肉）色澤深紅嘅霜降牛肉，油花分佈平均，切成一小件一小件，第一次燒可能過咗火，有點韌，第二次就理常好多，由於肉嫩又帶好重油份，所以，小弟較鍾意以生菜包住，再加啲青瓜一齊食；餐牌標明喺新麻蒲五花肉，由於供應問題，改以色澤粉嫩嘅秘製豬頸肉代替，睇落同樣脂肪分佈勻巡，切成條形，咬落有種爽脆感，一樣油香滋味。
下層（新麻蒲護心肉、新麻蒲秘製牛五花肉）較深色喺護心肉，晌喜來稀肉嘅食文都介紹過，所以唔多敘述，相對淺色喺牛五花肉。前者因為喺一組肉筋，所以形狀比較細小，無乜脂肪，但黐住少少筋膜，口感喺柔韌有彈性；後者攤開後喺薄薄一大片，輕燒即可，嫩滑油香富肉味，淨食或包生菜皆宜。
由於當日準備有啲不足，出菜有啲亂，而套餐內嘅火炙霜降牛肉壽司亦無緣一會，此外，飯麵一類主食亦未能供應，實在可惜！藍天檸檬汽水、覆盆子紅醋汽水 $28
食住韓燒真喺唔飲嘢唔得，飲品中有幾款幾新奇嘅汽水：藍天檸檬汽水、酸梅汽水、覆盆子紅醋汽水，款款都喺賣$28一杯，試咗其中兩款。藍天檸檬汽水其實跟飲一般汽水分別唔太大，猶如檸檬梳打，只喺色澤做得靚，望見都爽晒；而覆盆子紅醋汽水則特別少少，酸酸甜甜，有種飲酸梅湯嘅感覺。
韓國豆粉冰沫、韓國紅豆冰沫 $88雖然，有啲菜式未能一試，不過，臨尾嘅兩款韓式甜點，著實帶來驚喜。前者簡單以冰沫，加入黃豆粉、麻糬、杏仁片，一層又一層鋪製而成，而後者則多加一大撮紅豆。何謂「冰沫」，其實即喺刨冰，但刨得極度幼細，入口綿柔即化，帶濃香嘅牛奶味，配以豆香十足嘅黃豆粉，煙煙韌韌嘅麻糬，薄薄脆脆嘅杏仁片，真喺要味道有味道，要口感有口感，真喺食完韓燒嘅最佳甜品，不容錯過，而且份量頗大，莫講喺二人份，3-4人都夠試。
如覺得晚市消費有啲貴，午市亦有套餐供應，15款午餐可供選擇，類別都幾多，有石鍋拌飯、冷麵、豆腐鍋、大醬湯、烤肉……等等，收費由$58-$95（+10%服務費），以銅鑼灣區都算喺合理收費。
雖然服務有唔少甩漏，但店員嘅誠懇可嘉，希望能繼續改善，守住No.1嘅招牌。在此多謝食友邀請，讓小弟掹車邊嚟到新麻蒲再嚐多款韓式烤肉。
Post
