魚一丁刺身居酒屋 (Closed)

對上一次幫襯過佢哋個便當，印象唔錯吓 (雖然有D貴) 。於是今日下晝又去食Lunch，叫咗過雜錦魚生飯Set。初時以為係一大碗上，攞到嚟先至知係用一隻好大嘅碟上。份量好多吓！同傳統嘅定食一樣，個餐跟埋前菜、咸菜同味噌湯。先講味噌湯，味道夠味得嚟唔太咸，掂！不過配料只得昆布就未免馬虎咗D，至少都可以加D豆腐粒或金菇等配料啦。再講，前菜同咸菜都係令我覺得一樣有D馬虎嘅感覺。雖則前菜大多數(即使正宗嘅日本料理) 都係用D頭頭尾尾剩餘物資做出嚟，但係今次呢個汁煮南瓜 (凍食) ，望落去就未免有D求其，上次食便當嘅時候前菜係大根煮魚頭，味道同誠意就高好多呀！咸菜只放一種顏色嘅漬物 (平時嗰D係兩隻色) 亦都好似唔係咁有誠意！最後輪到主角魚生飯，材料有三文魚、八爪魚、鱆紅魚、赤身、甜蛋、蟹籽同埋三文魚籽等等，中間仲有隻甜蝦！材料咁多，知但係好難得樣樣嘢都咁新鮮！隻甜蝦尤其彈牙鮮甜！呢個飯總算幫呢個餐攞番好多分數！當日胃口大好！叫多咗個吉列炸蚝，三大隻，麵包糠外皮唔太厚，蚝算係幾Juicy吓。其實以魚一丁嘅定價，應該可以做得更加好。