MangoChaCha (Closed)

剛剛幫襯完帕莎，埋尾無樣甜品叫得落手，但同行友人談興正濃，諗起呢間經常同我有緣無份嘅台灣甜品店，順便嚟試吓。        開宗明義主打杧果甜品，標榜選用台灣愛文杧果，門外電視NON STOP播放店方喺台灣電視節目點點滴滴，擺明車馬洗腦。等入座嗰15分鐘，電視不停播出老闆兩公婆HARD SELL產品，仲勁過海X堂個鬍鬚仔😒        裝修走簡約新潮路線，亦有搞笑掛畫。夜晚11點都仲係全場爆滿，要等大約15分鐘先有位。一坐低侍應叫我哋喺FB加LIKE,即送3杯鮮打杧果汁，杯杧果汁酸唔酸甜唔甜，心諗送嘅嘢唔好要求咁高，期望真金白銀幫襯嘅甜品會正常番啲。今次就叫咗推介嘅杧果湯丸同愛文流心。杧果湯丸$38用蕃薯搓皮嘅杧果饀湯丸配桂花糖水底，外皮煙韌糖水清甜，反而杧果極酸而少杧味，我覺得深井F記同西貢M記甚至許留S嘅杧果都出色過呢度😩愛文流心$68即係杧果饀心太軟配開心果雪糕。蛋糕鬆軟，杧果流心夠熱，但核心問題係杧果酸而無香味，令成份甜品失去意義😔連碟上嗰兩粒杧果都係唔爭氣，只好講一句，我唔識欣賞愛文杧果，而我，同MANGO CHA CHA，由於誤會而幫襯，因了解而無下次。