橫綱

Open Now

Now Closed

第二次嚟幫襯，從未坐過水吧位，咁啱上一檯客剛剛離開，我哋兩個人就可以試吓坐。縱然拉麵店一貫座位狹窄，然而店家貼心地將座位設計成凳底可以擺放隨身物品，一讚。大堆調味料任君自行調味。細飯先上，嗱幾時都係咁話，唔好貪口爽响主打食麵嘅地方點飯食，認真麻麻哋。日式咖哩嘅所謂「甘口」甜味，個人唔係太識欣賞，而只有兩小塊牛肉嚟講，個人覺得小器咗啲。之不過咁，呢個飯絕對係唔難食嘅。所謂嘅「味玉」就即係有調味嘅糖心蛋，蛋嘅熟度恰到好處，除咗勁正嘅日本蛋味之外，佢仲有一啲酒味咁嘅獨特調味，好食！雖然呢個麵冇叉燒，但係佢有一啲疑似係叉燒切片時剩低嘅邊角料，咬落焦香爽口，拍得住叉燒，仲冇咁多肥肉添！個人其實唔建議食醬油味嘅湯底，點解呢？因為佢個湯底好似冇熬過咁，好似只係用醬油溝出嚟咁樣，但係飲落又幾清甜，冇豬骨湯咁滯。麵絕對係爽口靠得住，而且配菜都係清新好味嘅。叉燒更加唔駛講啦！足料油潤香口好味！