牛摩 (荃灣千色匯I) (Under Renovation)

之前食宵夜放題要開足馬力去食，雖然飽足，但一個鐘真係好趕，今次做指定分店星期一至五，午市90分鐘放題一律食到五點，大把時間，二點後入座免加一，吹雞嚟食精選或特級牛肉仲四人同行，一人免費！今次比之前午市嚟都多人，但大多係食定食。食物比之前都齊，蔬菜望落都比較新鮮，但速度比平時慢，食完個前菜，碟牛嚟咗個鍋都未到，泡菜湯底同九州地獄湯底，兩個都唔太夠味，好在有泡菜攞。美國特級牛肉，每碟都嚟得好慢，首碟口感較滑，之後明顯唔同咗，牛色更深，更有囗感，牛味更濃，除第二碟外觀較差，之後越嚟越靚。好在時間充裕，就算職員太忙出得慢都唔大影響，未嚟肉就飲沙冰，食朱古力雪糕、泡芙，蛋糕，怕飽又有涼粉，啫喱。依間勝在次次嚟大大碟，所以叫幾碟已夠回本，如果食唔到梗多肉，單碟放題都低至8折，所以話宜家食火鍋真係出街食抵過自己整！