馬華餐廳 (Closed)

上次幫襯完馬華後，今日再次經過幫襯下午茶，上次食過西多加腸，今次就改食番個飯同三文治，肥柑太叫左揚州炒飯，我自己就叫左個公司治，再跟餐叫左咖啡同奶茶。個揚州炒飯幾大碟下，有少少鍋燶，但份量足夠，以三十幾蚊既價錢比較出面一般茶餐廳，真係無呃到料。食落唔似出面落好重味精，入面材料齊全，有蝦有叉燒同蛋，唯一美中不足，就係個飯既蛋底不足，食落就唔係太香口。公司治好大份，足料到爆，由多士開始計，炒蛋、豬扒、蕃茄、火腿、雞肉、青瓜，足足有三吋以上厚，食料亦新鮮，好似蕃茄係新鮮有汁，豬扒同雞肉都係熱既，味道方面就唔錯，但因為太大件，一唔小心食既話，就會跌左D配料出黎，我食食下都唔覺意跌左件雞肉。最後就係佢地既熱飲，最簡單既咖啡同奶茶，但出面做飲食，就往往忽略最簡單既野，呢度既熱飲首先要讚就係個杯，一摸就發覺成個杯都係好熱，同埋第一啖飲果陣成杯野飲都Keep住好熱，出面無心機沖既熱飲，好多時沖完出黎，到個客到，已經因為個杯唔熱或者沖既水唔係滾既關係，溫度低左好多，搞到成杯野飲既味道都唔同晒，呢度就唔會有呢個問題，起碼你要飲到一杯，先發覺杯啡開始凍。同埋佢地沖既咖啡雖然有少少燶味，但入口就唔覺得係煮燶左